有部份條目可能因為資料較多，又或者是因為編輯者認為冇必要，從而刪減條目入面嘅內容。然而，我發現有啲嘅條目似乎過度簡化，令好多有研究意義或者特別資訊嘅資料被刪除。

《香港巴士大典》有兩類讀者

1. 巴士迷 / 交通愛好者

2. 公眾人士

對於 1，呢類人士有可能需要呢啲嘅資料作歷史研究。我相信香港巴士大典可以營運幾耐嘅時間，甚至乎一啲 source 已經被刪除之後，香港巴士大典都依然健在。如果刪除太多資料，亦都代表多年之後想研究嘅人可能失去呢類嘅資訊。舉例：「78X及79X線為城巴首兩條服務北區的獨營專營巴士路線」呢個資訊喺而家的確好多交通愛好者都知，但過多幾年，甚至幾十年，到其他人希望研究呢條線嘅歷史嗰陣，咁就會失去呢個資訊。有好多資訊喺多年之後或者會成為好有用嘅資料，就好似我最近都係睇呢度先知 85P（第一代）係第一條用 P 做尾嘅路線咁。

對於 2，呢類人士的確唔需要研究意義嘅資料，但佢哋需要交通資料。雖然呢度唔係旅遊指南 / 地圖，但係呢類人可能會使用 Google 等搜尋器入咗嚟呢度睇交通資料，如果一啲有指南作用嘅資料被刪除，咁亦都可能會令公眾對呢個網站留下負面印象。舉例：流水響呢個條目入面，我曾經加入類近「前往流水響水塘嘅乘客比較適合喺山麗苑落車」嘅字眼，不過其他編輯嘅表示唔應該做咗指南嘅角色，最終被改為「從流水響道轉入布格仔路及皇后山徑設有行人通道往返山麗苑」呢個比較隱喻嘅講法，但係本身市民可能就係唔識路，然後喺 Google search 咗入嚟，佢哋根本唔會得到「去流水響水塘可以考慮山麗苑落車」呢個資訊。（尤其長者，佢哋可能唔識 Google Search 同 Google Map 搜尋嘅分別，亦都未必可以消化同歸納網上資訊）同時呢類型嘅人亦都唔需要太多嘅研究資訊，否則可能會令到佢哋覺得資訊好混亂。

我認為應該要好好諗下同討論下應該點樣平衡兩者嘅需求，同埋應該點樣確保條目簡潔得嚟又唔會放棄好多資料。